Kortpad-Afrikaans (2021)

Ek kan Kortpad-Afrikaans (2021) aanbeveel. Dit is ʼn “tweetalige kontrolebron” oor Afrikaanse grammatika wat primêr gefokus is op die aanleer van Afrikaans deur tweedetaalsprekers en vreemdetaalsprekers van Afrikaans. Met ander woorde, dit is ʼn boek oor Afrikaanse grammatika wat jou kan help om Afrikaans te leer. Dit is ook handig vir eerstetaalsprekers van Afrikaans al is daar, as gevolg van die fokus op tweedetaalsprekers en vreemdetaalsprekers van Afrikaans, ook Engelse teks in die boek. Ek sou hierdie boek aanbeveel vir enige een wat ʼn eenvoudige naslaanbron oor Afrikaanse grammatika soek.

Die boekbekendstelling

Op 25 Mei 2022 om 19:00 het Die Suid-Afrikaanse Akademie vir Wetenskap en Kuns en African SUN Media ʼn boekbekendstelling op Facebook en Zoom gehad. Hierdie bekendstelling sal op YouTube beskikbaar wees. Anne-Marie Beukes het die verwelkoming gedoen. Wannie Carstens het ʼn onderhoud gevoer met die drie skrywers Rina Loader, Tobie van Dyk en Charlene Human. Die inligting in hierdie plasing kom uit hierdie bekendstelling uit.

Waar kan jy Kortpad-Afrikaans koop? 

Jy kan dit aanlyn aanskaf by die volgende verskaffers:

Jy kan die boek ook direk by die uitgewer bestel: 

  • AFRICAN SUN MeDIA: 021 201 0071 / orders@africansunmedia.co.za

Die skrywers en hoekom hulle die projek aangepak het

Die skrywers het verskillende akademiese agtergronde, maar hulle het Afrikaans en die studie en onderrig van Afrikaans in gemeen. Daar is, volgens Van Dyk, min boeke beskikbaar vir Afrikaanse taalverwerwing. Dit is hierdie gaping in die mark en geleentheid vir vernuwing van die skrywers aangegeryp het. Die doelwit was om ʼn boek te skryf wat toeganklik is vir die vreemdetaalspreker van Afrikaans. Loader, wat werk in Oostenryk, verduidelik dat ʼn boek soos Kortpad-Afrikaans baie sal help vir die onderrig van Afrikaans in die buiteland. Oorsee is dit soms moeilik om Suid-Afrikaanse handboeke in die hande te kry. Kortpad-Afrikaans is ʼn alles-in-een-boek en is byvoorbeeld maklik om oorsee te bekom. Dit is natuurlik ook as ʼn eboek beskikbaar. Dit is ʼn handige boek vir selfstudie en naslaan.

Die inhoud van die boek

Volgens die skrywers is die skryfstyl van die boek is eenvoudig en duidelik. Die boek is ongeveer 200 bladsye. Dit het sewe hoofstukke. Die eerste hoofstuk dek die geskiedenis en erfenis van Afrikaans. In hierdie hoofstuk kan jy leer hoe die taal en kultuur van Suid-Afrika geïntegreer is met mekaar. Dan is daar hoofstukke oor verskeie grammatikareëls en verduidelikings. Dit sluit onder meer klankleer, sintaksis, woordsoorte, sinstruktuur, en betenislees in. Die boek bevat ook “kortpad-info” in blou-blokkies wat elke paar bladsye verskyn wat die inhoud in eenvoudige opsommings saamvat. Die inhoud is alles wat tipies in Afrikaanse handboeke voorkom, maar in meer detail en sal ʼn student deur al vyf jaar van hoërskool help. 

Wat die boek uniek maak

Hier volg ʼn paar kolpunte wat die skrywers self genoem het in verband met die boek. Dit is die skrywers se siening van hoekom hierdie boek ʼn unieke bron is:

  • Die inhoud se vlakke is gemerk volgens die Common European Framework of Reference for Languages se verskillende vlakke. Dit maak die boek uiters handig in die internasionale mark en gee vir die opvoeder ʼn aanduiding watter dele van die boek pas by watter soort aanleerder. 
  • Die boek bevat Engelse verduidelikings wat dit baie gebruikersvriendelik maak. 
  • Die uitleg en die kleurgebruik ontsluit die leermateriaal. Met ander woorde, die kleur van die teks maak dit maklik om te sien watter soort inhoud dit is.
  • Alhoewel die CAPS-leerplan in ag geneem is met die skryf van die boek is hierdie boek nie op ʼn spesifieke leerplan gebaseer nie en daarom kan jy die boek se inhoudopgawe gebruik om te kies watter inhoud vir jou gaan pas. 
  • Die skrywers het gewerk met die aanname dat almal wat die boek optel nie noodwendig die fonetiese alfabet gaan ken nie. Daarom is daar Engelse voorbeelde om die leser te help met die uitspraak. 
  • Tegniese terme word in eenvoudige taal weergegee. 
  • Standaardafrikaans is bloot ʼn vertrekpunt. Daar word gereken met al die verskillende variasies van Afrikaans
  • Hierdie boek is die eerste boek in ʼn reeks. Daar volg nog werkboeke wat sal terugverwys na hierdie naslaanbron. 
  • Hierdie boek is handig vir die flipped classroom of omgekeerde klaskamer-model. Onderwysers kan leerders met hierdie boek bemagtig. 
  • Daar is gesprekke met onderwysers gevoer met die skryf van die boek. Dit is uiters bruikbaar vir skoolonderwysers.

Skryf Afrikaans is ‘n skryfblog oor onder meer akademiese geletterdheid. Indien jy meer wil leer oor Afrikaans en hoe om die akademiese omgewing te navigeer kliek hier.

Cat with a book. The title of the book is "Kortpad-Afrikaans"
Skets van ʼn kat wat in sy noppies is met Kortpad-Afrikaans deur Aletta Simpson

Leave a Reply

Your email address will not be published.